Hai unhas semanas puxemos en marcha unha instalación de storytlr no dominio blogomillo.org. storytlr é un software recentemente liberado despois de animar o servizo web do mesmo nome, storytlr.com. Os seus creadores, despois de non dar atopado financiamento para cubrir gastos, decidiron «abandonar» o código, e deixalo en mans da comunidade. Polo de agora hai un lugar onde deixar recado dos erros para un código que precisa bastante man esquerda.

Neste tempo, nestas primeiras semanas de funcionamento en blogomillo.org xa temos uns cantos usuarios que estan a modelar o comportamento das suas ferramentas por camiños non sempre agardados. Hai quen só esta a recoller as suas entradas no twitter, ou no blogue, hai quen esta agrupando espazos de apuntamento diverso (del.icio.us, compartidos de google reader), e quen xunta outras fontes máis multimedias.

Pero a ferramenta pode dar moito máis de si: é posible crear pestanas para diferentes fontes, agrupar as historias ente duas datas para editar unha «narración» híbrida empregando elementos de todo tipo: videos, twits, elementos compartidos, comentarios… ata montar un pase de diapositivas a partir de imaxes de fontes diversas. Non é só o feito de ter todo o ruido que producimos na rede xunto nun só sitio: é a posibilidade de empregar todo este contido como materia prima para elaboracións posteriores, e como arquivo no que podemos facer procuras, e do que podemos extraer etiquetas, conservar para o futuro…

A lista de contadores de historias é polo de agora a destes dez: cies, chimpin, odemo, ivanmendezlopez, bretemas, iarrovawo, alfredoferreiro, tatimancebo, pedro. Seguimos agardando pola tua solicitude para activar unha conta no sistema. E, visto que vai servindo para algo, estamos xestionando a tradución.